Шрифт

Каноны Октоиха Господу

Канон Господу нашему Иисусу Христу, глас 1.

Тропарь, глас 1:

В беззако́ниих зача́вся аз, блу́дный, не дерза́ю взира́ти на высоту́ Небесну́ю, но дерза́я на человеколю́бие Твое, зову́: Бо́же, очи́сти мя, гре́шнаго, и спаси́ мя.

Аще пра́ведник едва́ спаса́ется, аз где явлю́ся, гре́шный? Тяготы́ и зно́я дневна́го не понесо́х, но с нае́мники единонадеся́того часа́ сопричти́ мя, Бо́же, и спаси́ мя.

Слава и ныне: Упова́ние христиа́н, Пресвята́я Де́во, Его́же родила́ еси́ Бо́га па́че ума́ же и сло́ва, непреста́нно моли с го́рними си́лами да́ти оставле́ние грехо́в, нам всем и испра́вление жития́, ве́рою и любо́вию при́сно Тя чту́щим.

Кано́н умили́тельный, его́же краестро́чие: Прегреше́ний мои́х скве́рну омы́й, Сло́ве. Творе́ние господи́на Ио́сифа. Гла́с 1.

Пе́снь 1

Ирмо́с: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Припев: Помилуй мя Боже, помилуй мя!

Грехо́в мои́х мно́жество, по мно́жеству, Христе́, ми́лости Твоея́, молю́ся Ти́, потреби́, и помышле́ние обраще́ния ми́ да́руй: я́ко да Твою́ сла́влю я́же па́че ума́ благосты́ню. (Дважды)

Яви́лся еси́ за милосе́рдие щедро́т, на земли́ воплоща́емь Челове́к: те́мже па́че челове́ка, Сло́ве Бо́жий, согреши́вша приими́ мя ны́не покая́нием к щедро́там Твои́м припа́дающаго.

Слава и ныне: Богоро́дичен: Чи́нове безпло́тных с на́ми воспева́ют Тя́, Де́во Всепе́тая: необъиме́ннаго бо во чре́ве Твое́м воплоще́нна родила́ еси́, пребы́вши Де́ва я́коже и пре́жде рождества́, Богоневе́сто.

Пе́снь 3

Ирмо́с: Еди́не ве́дый челове́ческаго существа́ не́мощь, и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й: одушевле́нный Хра́ме неизрече́нныя сла́вы Твоея́, Человеколю́бче.

Возни́кни, гряди́, о душе́! и возопи́й Созда́телю Твоему́, та́йная твоя́ вся́ Ве́дущему, и покая́ния плоды́ покажи́: я́ко да поми́лует тя́ Ще́дрый Госпо́дь, и огня́ ве́чнаго изба́вит. (Дважды)

Очи́сти, Еди́не Бла́же, очи́сти и спаси́ мя, я́ко мыта́рь со стра́хом зову́ Ти: мно́жеством грехо́в влеки́йся, и преклоня́емь е́смь тягото́ю прегреше́ний, и студа́ безме́рнаго исполня́яйся.

Слава и ныне: Богоро́дичен: Свята́я Богоневе́сто Чи́стая, свя́то породила́ еси́, во святы́х почива́ющаго, Сы́на и Сло́ва Отцу́ собезнача́льнаго, освяща́ющаго о Святе́м Ду́се, и́же того́ благоче́стно освяща́ющыя.

Седа́льны. Гла́с 1.

Объя́тия О́тча отве́рсти ми́ потщи́ся, блу́дне ижди́х мое́ житие́, на бога́тство неиждива́емое взира́яй щедро́т Твои́х, Спа́се, ны́не обнища́вшее мое́ се́рдце не пре́зри. Тебе́ бо, Го́споди, во умиле́нии зову́: согреши́х Ти́, спаси́ мя.

Сла́ва, и ны́не, Богоро́дичен: Упра́ви, Чи́стая, окая́нную мою́ ду́шу, и уще́дри ю́ от мно́жества прегреше́ний, во глубину́ попо́лзшуюся поги́бели, Всенепоро́чная, и в ча́с мя́ стра́шный сме́ртный Ты́ исхити́ оглаго́лующих де́монов, и вся́кия му́ки.

Пе́снь 4

Ирмо́с: Го́ру Тя́ благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Кому́ тя, душе́ моя́ окая́нная, уподо́блю, де́лающую лю́тая, и не творя́щую до́брых? обрати́ся, возопи́й тебе́ ра́ди Обнища́вшему во́лею: Сердцеве́дче, уще́дри, и спаси́ мя. (Дважды)

Определи́вый покая́ние, Спа́се, обраща́ющымся, е́же ми́ пода́ждь бла́же, пре́жде конца́ житию́ дая́ ми умиле́ние и воздыха́ние, я́ко блудни́це пе́рвее, облобыза́ющей но́зе Твои́, Влады́ко.

Слава и ныне: Богоро́дичен: И́же дре́вле из Отца́ нерожде́нна Сы́н рожде́йся, рождество́ име́ ле́тное, из Тебе́, де́во, вопло́щься, ле́тную бра́нь земноро́дных отя́ти хотя́, Благоутро́бный, и́же дне́й и ле́т превы́ше Сы́й.

Пе́снь 5

Ирмо́с: Просвети́вый сия́нием прише́ствия Твоего́, Христе́, и освети́вый Кресто́м Твои́м ми́ра концы́, сердца́ просвети́ све́том Твоего́ богоразу́мия, правосла́вно пою́щих Тя́.

Впадо́х в тле́ние страсте́й, и бою́ся Твоего́ пра́веднаго суди́ща, пра́ведный Го́споди. Те́мже молю́ся Ти́: укрепи́ мя твори́ти де́лания блага́я, оправда́ющая мя́. (Дважды)

Безве́стная и та́йная се́рдца моего́ Ты́ ве́си, Бо́же мо́й, и Зижди́телю, и Го́споди, не осуди́ у́бо мене́ в ча́с суда́, внегда́ прии́деши суди́ти вся́ческим.

Слава и ныне: Богоро́дичен: Вети́йствующая уста́ не возмо́гут, рождества́ Твоего́ неизрече́нное пове́дати чу́до, Богоневе́сто: Несказа́ннаго бо ражда́еши, и на объя́тиях но́сиши руко́ю содержа́щаго вся́ческая.

Пе́снь 6

Ирмо́с: Обы́де на́с после́дняя бе́здна, не́сть избавля́яй, вмени́хомся я́ко о́вцы заколе́ния, спаси́ лю́ди Твоя́, Бо́же на́ш: Ты́ бо кре́пость немощству́ющих и исправле́ние.

Сы́й вра́чь Христе́, исцели́ стра́сти се́рдца моего́, и омы́й мя́ от вся́кия скве́рны, струя́ми, Иису́се мо́й, умиле́ния, да пою́ и велича́ю благоутро́бие Твое́. (Дважды)

Блудя́ща мя́ на путе́х поги́бели, и в ро́в согреше́ний впа́дающа мя́ обрати́, Христе́, и к незаблу́дным стезя́м наведи́ Твои́х честны́х оправда́ний, я́ко да сла́влю Тя́.

Слава и ныне: Богоро́дичен: О́гненных слу́г О́гнь роди́вши, яви́лася еси́ Всенепоро́чная и тва́ри вся́кия перводе́льне, Пречи́стая Де́во преиму́щая, в жена́х благослове́нная богора́дованная.

Седален гла́с 1

Безу́мно от Тебе́ удали́вся, Всеще́дре, блу́дно мое́ ижди́х житие́, рабо́таяй страсте́м безслове́сным всегда́: но приими́ мя А́нгелов моли́твами, О́тче благоутро́бне, я́коже блу́днаго о́трока, и спаси́ мя.

Песнь 7

Ирмо́с: Тебе́ у́мную, Богоро́дице, пе́щь разсмотря́ем ве́рнии: я́коже бо о́троки Спасе́ три́ превозноси́мый, ми́р обнови́, во чре́ве Твое́м всеце́л, хва́льный отце́в Бо́г, и препросла́влен.

Львы́ дре́вле Дании́л укроти́, сожи́тельницу име́яй доброде́тель: тому́ поревну́й, о душе́, и рыка́ющаго всегда́ я́ко льва́, и объя́ти хотя́ща тя́, е́же к Бо́гу взира́нием при́сно, безде́льна  сотвори́. (Дважды)

Премно́жеством блуда́, Го́споди, ду́шу оскверни́х лю́те. Превосходя́щую у́бо, Христе́, имы́й благосты́ню, приими́ я́ко блу́днаго, и пою́ща мя́ уще́дри: Препе́тый отце́в Бо́г, и препросла́влен.

Слава и ныне: Богоро́дичен: Зако́ни естества́ в Тебе́ обновля́ются: Законода́вца бо Христа́ кроме́ зако́н плотски́х ражда́еши, Всенепоро́чная, все́м избавле́ние законополага́юща пою́щым: Препе́тый отце́в Бо́г и препросла́влен.

Пе́снь 8

Ирмо́с: В пещи́ о́троцы Изра́илевы, я́коже в горни́ле добро́тою благоче́стия, чисте́е зла́та блеща́хуся, глаго́люще: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Изба́вителю мо́й благоутро́бне Христе́, ны́не одержа́щия мя́ мглы́ грехо́вныя, и вся́ких искуше́ний изба́ви зову́ща: благослови́те вся́ дела́ Госпо́дня Го́спода, по́йте и превозноси́те во вся́ ве́ки. (Дважды)

Егда́ хо́щеши приити́, Христе́, во сла́ве, суди́ти ми́ру, стоя́нию избра́нных Твои́х сопричти́ и мене́, вопию́ща и глаго́люща: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Слава и ныне: Богоро́дичен: Свяще́ннии Тя́ гла́си издале́ча провозвести́ша, Пречи́стая, бы́ти Тебе́ ма́тери вся́ сотво́ршему Бо́гу. Ему́же пое́м: благослови́те вся́ дела́ Госпо́дня Го́спода, по́йте и превозноси́те во вся́ ве́ки.

Пе́снь 9

Ирмо́с: О́браз чи́стаго рождества́ Твоего́ огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́, Богоро́дице, непреста́нно велича́ем.

Я́коже ханане́а зову́ Ти: поми́луй мя́, Сло́ве: ду́шу бо и́мам де́монскими нанесе́нии бе́дствующую, и безу́мно беззако́нная де́лающую, и нечу́вствующую Боже́ственнаго Твоего́ стра́ха, Долготерпели́ве. (Дважды)

Поста́ви, Го́споди, на ка́мени повеле́ний Твои́х души́ моея́ но́зе, и безсту́дно запя́ти мя́ хотя́ща, запни́ зми́я, и изба́ви мя́ сего́ злоде́йства, я́ко Бла́г и Многоми́лостив.

Слава и ныне: Богоро́дичен: Но́сиши вся́ Нося́щаго, и дои́ши все́м пи́щу Даю́щаго, ве́лие и стра́шно е́же па́че ума́ Твое́ та́инство, Ковче́же Честны́я Святы́ни, Де́во Богоро́дице. Те́мже Тя́ ве́рою ублажа́ем.

Молитва

Тебе́, Го́споди, еди́ному Благо́му и Непамятозло́бному, испове́даю грехи́ моя́, Тебе́ припа́даю вопия́, недосто́йный: согреши́х, Го́споди, согреши́х и несмь досто́ин воззре́ти на высо́ту небе́сную от мно́жества непра́вд мои́х. Но, Го́споди мой, Го́споди, да́руй ми сле́зы умиле́ния, еди́ный Бла́же и Ми́лостивый, я́ко да и́ми Тя умолю́, очи́ститися пре́жде ко́нца от вся́каго греха́: стра́шно бо и гро́зно ме́сто и́мам проити́, те́ла разлучи́вся, и мно́жество мя мра́чное и безчелове́чное де́монов сря́щет, и никто́же в по́мощь спу́тствуяй или́ избавля́яй. Тем припа́даю Твое́й бла́гости, не преда́ждь оби́дящым мя, ниже́ да похва́лятся о мне врази́ мои́, Благи́й Го́споди, ниже́ да реку́т: в ру́ки на́шя прише́л еси́, и нам пре́дан еси́. Ни, Го́споди, не забу́ди щедро́т Твои́х и не возда́ждь ми по беззако́нием мои́м, и не отврати́ лица́ Твоего́ от мене́: но Ты, Го́споди, накажи́ мя, оба́че ми́лостию и щедро́тами. Враг же мой да не возра́дуется о мне, но угаси́ его́ на мя преще́ния и все упраздни́ его де́йство, и даждь ми к Тебе́ путь неуко́рный, Благи́й Го́споди: зане́же и согреши́в, не прибего́х ко ино́му врачу́, и не простро́х руки́ моея́ к бо́гу чужде́му, не отри́ни у́бо моле́ния моего́, но услы́ши мя Твое́ю благо́стию и утверди́ мое́ се́рдце стра́хом Твои́м, и да бу́дет благода́ть Твоя́ на мне, Го́споди, я́ко огнь попаля́яй нечи́стыя во мне по́мыслы. Ты бо еси́, Го́споди, свет, па́че вся́каго све́та; ра́дость, па́че вся́кия ра́дости; упокое́ние, па́че вся́каго упокое́ния; жизнь и́стинная и спасе́ние, пребыва́ющее во ве́ки веко́в, аминь.

Каноны Господу